ಮತ್ತೊಂದು ಮೇ ಬರುವ ಸೂಚನೆ
ಸುಸ್ಪಷ್ಟ
ಹೊಸ ಕರವಸ್ತ್ರಗಳ ಕೊಳ್ಳಬೇಕಾಗಿದೆ

ನೆಪಮಾತ್ರದ ಟಾರು ರಸ್ತೆ ಮೇಲೆ ಹೊಸ
ಕಾರುಗಳು ಓಡಾಡುವಾಗ
ಗಣಕ ಯಂತ್ರದ ಮೇಲೊಂದಷ್ಟು
ಬಿಸಿ ಧೂಳು
ಬಿಳಿ ಮೋಡಕ್ಕೂ ಚೂಪು ಚೂಪು
ಈಟಿ ಎಸೆವ ಬೆಳ್ಳಿ ದೇವದಾರುಗಳು
ಮೂರು ಸಾವಿರದ ಕೊಡಲಿಗಳಿಗೆ
ಶರಣಾಗುವಾಗ
ಕನಸು ಹೊತ್ತ ಹದಿನಾರರ ಮನಸು
ಕ್ರಾಂತಿ ಎಂಬ ಅಪರಾಧ ಎಸಗುತ್ತಾ
ಮೆಲ್ಲಗೆ ಕಾಣೆಯಾಗುತ್ತದೆ

ಹದಿನಾರರಲ್ಲಿ ಕಲ್ಲು ತೂರಿದ ಬಸ್ಸು
ಹಳೆಯದೇ ದಾರಿಯಲ್ಲಿ ನುಲಿಯುತ್ತಾ ಸಾಗುವಾಗ
ಮನಸು ವಿದೇಶಿ ಕಾಫಿ ಹೂ
ಮೇಲಣ ಸ್ವದೇಶೀ ದುಂಬಿ
ಜೋಗುಳಕ್ಕೆ ನಿದ್ರಿಸುತ್ತದೆ
ಚಿಟ್ಟೆ ಚಿತ್ತಾರದ ಕನಸುಗಳ
ನಡುವೆ ತೇಲುವಾಗ
ಹದಿನಾರರ ಕ್ರಾಂತಿಕಾರಿ ಕೊಲೆಯಾಗಿ
ಬೆಚ್ಚಿ ಬೆವರುತ್ತದೆ
ತಟ್ಟಿ ಮಲಗಿಸುವವರಾರು?

ನಿನ್ನ ಮೊಮ್ಮಗಳ ಮದುವೆಗೆ
ಆಮಂತ್ರಣ ಪೋಸ್ಟಿನಲ್ಲೇ ಬರುತ್ತದೆ
ಬೀಪಿ ಶುಗರ್ರು ಮತ್ತು
ಒದ್ದೆ ಕಂಗಳು ಓದಲಾರದಾದಾಗ
ಹೊಸ ಫ್ರೇಮಿನ ಕನ್ನಡಕ ಅಣಕಿಸುತ್ತದೆ
ಸದ್ದು ಸತ್ತ ಕಾರಿಡಾರುಗಳಲ್ಲಿ
ದಾದಿಯರ ಗೆಜ್ಜೆಗಳ ಆಕ್ರಂದನ
ಅತ್ತರೋ ನೆತ್ತರೋ ತಿಳಿಯದ ವಾಸನೆಗೆ
ಕೂತಲ್ಲೇ ತೂಕಡಿಕೆ
ಎಲ್ಲಕ್ಕೂ ಬಿಳಿ ಕಸದ ಬುಟ್ಟಿಯದೇ ಸಾಕ್ಷಿ
ಎಲ್ಲಿ ಹೋದ ಇವ ಸರ್ಕಾರಿ ವೈದ್ಯ?

ಹದಿನಾರರ ಕನಸುಗಳ ಸಾಸಿವೆ
ಜೊತೆ ಹಾಕಿ ಒಗ್ಗರಿಸಿದರೆ
ಸಾರಿಗೆ ಉಪ್ಪು ಖಾರ ತುಸು ಹೆಚ್ಚೇ!

ನನ್ನೊಳಗಿನ ಉಗ್ರ ಕೊಡಬೇಕಾದ
ಅಸಲಿಗೆ ಬಡ್ಡಿಯ ಲೆಕ್ಕ ಮರೆಯುತ್ತಾನೆ
ಜನವರಿಯಲ್ಲಿ ಬಾರದ ಮಳೆ
ಮತ್ತು ನಿಲ್ಲದ ಚಳಿಗೆ ಶಪಿಸುತ್ತಾನೆ

ನನ್ನೊಳಗಿನ ಉಗ್ರ ನಿನಗಾಗಿ
ಲಿಫ್ಟುಗಳಲ್ಲಿ ಕಾಯುತ್ತಾನೆ
ಎದುರಾದಾಗ ಮಂಕಾಗುತ್ತಾನೆ
ನಗಲಾರದೆ ಅಳುತ್ತಾನೆ

ನನ್ನೊಳಗಿನ ಉಗ್ರ ನೂರಕ್ಕೆ
ನೂರಿಪ್ಪತ್ತು ಮಾರ್ಕ್ಸು ಗಳಿಸುತ್ತಾನೆ
ಕ್ಯಾಲ್ಕುಲೇಟರಿಗೆ ಬ್ಯಾಟರಿ ಹುಡುಕುತ್ತಾ
ರಾತ್ರಿಗಳ ಕಳೆಯುತ್ತಾನೆ

ನನ್ನೊಳಗಿನ ಉಗ್ರ ಹುಡುಕುತ್ತಾನೆ;
ಪಡೆಯುತ್ತಾನೆ; ಕಳೆಯುತ್ತಾನೆ ಮತ್ತು
ಕಳೆದದ್ದ ಮರೆತಂತೆ ನಟಿಸುತ್ತಾನೆ
ನಟಿಸುತ್ತಾ ಪಡೆಯುತ್ತಾನೆ

ನನ್ನೊಳಗಿನ ಉಗ್ರ ಪಾಸ್ ಪೋರ್ಟುಗಳ
ಹರಿದೆಸೆಯುತ್ತಾನೆ ಮತ್ತು
ಎಂದೂ ಮುಳುಗದ ಹಡಗಿಗೆ
ಕಾಯುತ್ತಾ ಮರಳಲ್ಲಿ ಪುಟ್ಟ ಗೂಡು ಕಟ್ಟುತ್ತಾನೆ

-೨-
ನಾ ಹೀಗೆಯೇ
ಪ್ರಾಸವಿಲ್ಲದ ಕವಿತೆಯಂತೆ
ಸ್ವರಗಳಿಲ್ಲದ ರಾಗದಂತೆ
ಕೊಟ್ಟು ಬಿಡುತ್ತೇನೆ ನನ್ನ ನಿನಗೆ
ಬರೆದು ಹಾಡಿಬಿಡು
ಹುಟ್ಟುತ್ತೇನೆ ನಿನ್ನ ಕಂಗಳೊಳಗೆ

-೩-
ಕನಸು…
ಹೆದ್ದಾರಿ ಖಾಲಿ ಇರುತ್ತಾ ನಿಧಾನ
ಸರ್ವಿಸ್ ರೋಡಲ್ಲಿ ಹೋಗೋದು
ಅರ್ಧ ರಾತ್ರೀಲಿ ಎದ್ದು
ಬುದ್ಧ ಆಗೋದು
ಸುಮ್ಮನೆ ಒಂದಿನ ಕದ್ದು
ಹಣೆಗೊಂದು ಮುತ್ತು ಕೊಡೋದು

-೪-
ಇಬ್ಬನಿಯೆಡೆ ಬಣ್ಣದ ಬೆಳಕು
ಚೆಲ್ಲುವ ದೀಪಗಳೇ
ಕಾಮನಬಿಲ್ಲು ಆಸ್ಪತ್ರೆಯಲ್ಲಿ ಹುಟ್ಟಿದ್ದು
ಪಕ್ಕಾ ಸುಳ್ಳು

ಟಿಪ್ಪಣಿ: ಇವೆಲ್ಲ facebook ನಲ್ಲಿ ಆಗಾಗ ಹಾಕಿದ್ದ status ಗಳು. ಮೆಚ್ಚಿದ, ಕಾಮೆಂಟ್ ಮಾಡಿದ ಗೆಳೆಯರಿಗೆ ಒಂದು ಥ್ಯಾಂಕ್ಸ್…

ದೀಪಾವಳಿ ನೆವಕ್ಕೆ ಪುಟ್ಟದೊಂದು
ಶಾಪಿಂಗು.
ಹ್ಯಾಂಗರಿಗೆ ನೇಣು ಬಿದ್ದ ಬಟ್ಟೆಗಳಲ್ಲಿ
ಇನ್ನೂ ಉಸಿರಿದೆ.
ಆಗಲೇ
ಮಹಜರಿಗೆ ಸೈನು ಹಾಕು ಅಂತಾನೆ
ಮೂರು ನಕ್ಷತ್ರದ ಪೋರ

ಹಾಗಾಗಿ…
ಓದುತ್ತ ಕಳೆದ ದೇವರುಗಳ
ಬರೆಯುತ್ತಾ ಹುಡುಕಬೇಕಾಗಿದೆ.

ಹಾಗಂತ
ನಿನಗೇನೂ ಚಿಂತೆ ಬೇಡ
ನಿನ್ನಿಂದ ಸಿಗರೇಟುಗಳನ್ನೇನು ಕೇಳುವುದಿಲ್ಲ
ನೀ ಹೆಚ್ಚೆಂದರೆ ಬೆಂಕಿಪೊಟ್ಟಣಕ್ಕೆ ದಿಸ್ಕೌಂಟು
ಕೊಡಬಲ್ಲೆ ಅಷ್ಟೆ

ಹಬ್ಬಕ್ಕೆ ಇರು ಅನ್ನೋಲ್ಲ
ರಿಟರ್ನ್ ಟಿಕೇಟು ಹೊತ್ತು ಬರುವವಳಿಗೆ
ಇರು ಅಂತ ಅನ್ನೋದಾದರೂ ಯಾಕೆ?

ಯಾಕಾದರೂ ಬಂದೆ ನೀ
ತಣ್ಣನೆಯದೊಂದು ಮೋಡದ ಮೇಲೆ
ಇಂತಾದ್ದೊಂದು ನಗು ಚೆಲ್ಲುತ್ತಾ?
ಯಾಕಾದರೂ ಇರಬೇಕು
ಆಯತದೊಳಗೊಂದು ವೃತ್ತ?

ಎಲ್ಲಾ ಊರುಗಳದ್ದೂ
ಒಂದೇ ಮುಖ
ಹೆದ್ದಾರಿಗೊಂದು ಪೆಟ್ಟಿಗೆ
ಅಂಗಡಿ
ಪಡಸಾಲೆಯಲ್ಲಿ ಚೌಕಾಬಾರ
ಅಥವಾ ಮೂರೆಲೆ
ಕಾಲದೂಡಲು ಯಾವುದೋ ಒಂದು ಆಟ

ಹಿಂಬಾಗಿಲ ಬಣ್ಣಗಳೇ ಬೇರೆ
ಎಲ್ಲವಕ್ಕೂ ಬೇರೆಯದೇ ಚಿತ್ತಾರ
ಒಂದೊಂದರಲ್ಲೂ ನಮ್ಮವೇ ಆದ
ನೂರೊಂದು ಸ್ವರ

ಮುಂಬಾಗಿಲು ಹಿಂಬಾಗಿಲು ಒಂದೇ ಇರಲಾರದೆ?

ಮೈಲುಗಳ ಲೆಕ್ಕ ಇಟ್ಟರೆ
ಒಂದಿಷ್ಟು ದೂರಗಳು ಕರಗುತ್ತಾ
ಮತ್ತಷ್ಟು ದೂರಗಳು ಚಿಗುರುತ್ತಾ
ಕೊನೆ ಬಂದದ್ದೆ ತಿಳಿಯದು.

ಕೊನೆಗೂ ಒಂದು ಮೈಲಿಗಲ್ಲು ಇದ್ದೀತೆ?

ಬಾಲ ಕುಣಿಸೋ ಹಕ್ಕಿ
ಹೆಕ್ಕುತ್ತಾ ಕಾಳು ಕುಕ್ಕಿ ಕುಕ್ಕಿ;
ತತ್ವಜ್ಞಾನಿಯೇ ಇರಬೇಕು ನೀ
ನಿನಗಾದರೂ ಗೊತ್ತೇ?

ಎಲ್ಲವಕ್ಕೂ ಆಯತ, ವೃತ್ತ ಮತ್ತು ನಗು
ಉತ್ತರ ಆದೀತೆ?

ಋತುಗಳು ತಿರುಗುತ್ತಲೇ ಇರುತ್ತವೆ.
ಇಬ್ಬನಿಗೆ ಮಳೆಯ ಧ್ಯಾನ
ಮಳೆಹನಿಗೋ…
ಕಾಮನಬಿಲ್ಲಿನ ಕನಸು
ಕವಿತೆ ಹುಡುಕುತ್ತಲೇ ಸಾಯುತ್ತದೆ
ಕಳೆದುಹೋದ ಸಾಲ

ಎಳ್ಳಮಾವಾಸ್ಯೆ ಜಾತ್ರೆಯಲ್ಲಿ
ಕಳೆದ ಕಾರು
ಮಿನರ್ವಾ ಸಿಗ್ನಲ್ಲಲ್ಲೊಂದು
ಬಾರು
ಪ್ರಾಸಕ್ಕೆ ಖಂಡಿತಾ ಕಾಯಲಾರವು
ಪಲ್ಸರು ಮತ್ತು ಅಲ್ಸರು

ಮೊನ್ನೆ ಹೀಗೆ
ಸತ್ತ ಕವಿತೆಯೊಂದು
ನಳನಳಿಸಿ ಗೊರಿಯಿಂದೆದ್ದು
ತನಗೆ ತಾನೇ ರಾಗವೊಂದ
ತೊಟ್ಟು
ಹಾಡಿಬಿಟ್ಟಿತಲ್ಲಾ…

ಗುಟ್ಟಿನ ವಿಚಾರ…
ಕಳೆದ ಸಾಲೊಂದು ಸಿಕ್ಕಿತಂತೆ
ಮುರಿದ ಕಾಲು ಬೆಳೆದಂತೆ…

ಆದರೂ…

ಮಳೆ ಹೂಗಳಿಲ್ಲದೀ ಶಿಶಿರದಿ
ಕಾಯುತ್ತದೆ ಒಂಟಿ ರೆಕ್ಕೆ ಹಕ್ಕಿ
ಬರಲಾರದ ತುಂಬಿಯ.
ಬಂದೀತಾದರು ಹೇಗೆ
ಮಗ್ಗಿ ಮರೆಸಿದ ಹುಡುಗಿ ನೀ
ಹಸೆಯೇರಿದಾಗ?

ನಾ ನಿಂತಲ್ಲೇ ನಿಂತು
ನಕ್ಷತ್ರವಿಲ್ಲದ ಪೋಲೀಸನ
ಇಷಾರೆಗೆ
ಕಾದಿರುವಾಗ
ಬಿಳೀ ಮೋಡಗಳ
ಕರಿ ಮೋಡಗಳು
ಅಟ್ಟಿ
ಕಪ್ಪು ಹೆಪ್ಪಾದಂತೆ

ಸಿಗ್ನಲ್ಲು ಬಿದ್ದರೂ…
ಮಳೆ ಬೀಳದು!

ಮಾತು ಕತೆ ಹರಟೆ
ವಾದ ವಿವಾದ
ನಗು ಮೌನ…
ಸ್ವಿಸ್ ಬ್ಯಾಂಕಲ್ಲಿ
ನಮ್ಮ ನಿಮ್ಮ ದುಡ್ಡು
ಕಜ್ಜಿ ಮೈಗೆ
ಆರೈಕೆಯಿಲ್ಲದ
ಉದಾಸ ರಸ್ತೆ
ಹೊಂಡ ಗುಂಡಿಗಳಲ್ಲೇ
ಎಮ್ಮೆಲ್ಲೆ ಫಂಡು.

ಬಯಲುಸೀಮೆಯ ಧೂಳಿಗೆ
ಉಸಿರು ಕಟ್ಟಿದಾಗ
ಒಂತರಾ ಖುಷಿ.
ಉಸಿರು ಕಟ್ಟಿದ್ದು
ನನಗೋ?
ಧೂಳಿಗೋ?

ಮನೆಯ ಮುಂದೊಂದು
ಗುಲಾಬಿ ಗಿಡವೇ
ಇಲ್ಲವಲ್ಲೇ ಅಕ್ಕ
ಅಂದೆ.
ನಿನ್ನ ತಂದು
ಕೈಗಿತ್ತಳು

ಹಗುರ ಹಗುರ ಮೈಯೊಳಗೆ
ಗುಲಾಬಿ ಮೇಲಣ
ಇಬ್ಬನಿಯಷ್ಟೇ ಹಗುರದ್ದೊಂದು
ಹೃದಯ
ಲಬ್ ಡಬ್ ಅಂದಾಗ
ಮತ್ತೆಲ್ಲ ಸ್ತಬ್ಧ.
ಯಾಕೆ ಬೇಕು ಹೇಳು
ಇಲ್ಲೂ ಹಾರನ್ನುಗಳ
ವೃಂದಗಾನ?

ನೀ ನಕ್ಕೆ…

ಆ ನಗುವೆಂದರೆ…

ಮೂಗಿನ ಮೇಲೊಂದು
ಹನಿ ಬಿದ್ದು
‘ಅರೆ, ಮಳೆ!’
ಅಂತ
ಬೆಚ್ಚಗಾದಂತೆ.

ನಕ್ಕದ್ದು ನಿಜವಾ?
ಇರಲಿ ಬಿಡು
ನಿನಗಿನ್ನೂ ನಗೋಕೆ
ಬರೋಲ್ಲವೇನೋ!
ಆದರೆ
ನನ್ನೊಳಗಿನ ಮಗು
ನಕ್ಕು ನಲಿದು
ನೀಲಿ ನೀಲಿ ಆಕಾಶ
ಆದದ್ದಂತೂ ನಿಜ

*****

ನಮ್ಮ ಮನೆ ಮುಂದೊಂದು
ಕೆಂಪು ಕಾರು.
ಕೆಂಪು ಅಂದಾಕ್ಷಣ ಅರಳಬೇಡವೋ
ಮೂಢಮತಿ.
ಒಮ್ಮೊಮ್ಮೆ
ಗುರುವೂ ಕೆಂಪು ಮತ್ತು ಕೆಂಪೂ ಲಘು
ಹೀಗೆಲ್ಲ ಆಗುತ್ತಂತೆ.

*****

ಇಲ್ಲೀಗ ಕರೆಂಟ್ ಇಲ್ಲ
ಮತ್ತು ಧೈವ ಸೃಷ್ಟಿ ಎಷ್ಟು
ಚಂದ ಅಲ್ಲವಾ?
ಹಲೋ ಹಲೋ ಮಿಟುಕಲಾಡಿ
ನಕ್ಷತ್ರ
ನಿನಗೊಂದು ಐ ಪಾಡು
ಗಿಫ್ಟು ಕೊಡುವೆ
ಹುಡುಗಿಗೊಂದು ಕವನ ಬೇಕು
ಬರೆದು ಕೊಡುವೆಯಾ?

*****

ಭೂಮಿಯ ಭಾರ
ಇಂತಿಷ್ಟು ಟನ್ನು ಅಂತ
ಸುಳ್ಳು ಲೆಕ್ಕಗಳ ತಂದು ಇಡಬೇಡಿರೋ.
ಸಧ್ಯ ನನ್ನೊಳಗಿನ ಭಾರಗಳ ಲೆಕ್ಕವೇ
ತಪ್ಪಿದಂತಿದೆ
ಅವಳು ದೂರದಲ್ಲೆಲ್ಲೋ ಮಗ್ಗುಲು
ಬದಲಿಸಿದ್ದರಲ್ಲಿ ಅನುಮಾನವೇ ಇಲ್ಲ.

ನನಗೆ ಇಂತಾದ್ದೊಂದು ಹೆಡ್ ಫೋನು ಬೇಕು
ಒಳಗಿನ ಶಬ್ದಗಳೆಲ್ಲ ಸತ್ತು ಹೋಗಿ
ಬರಿದೆ ಹೊರಗಣ ಸದ್ದು ಕೇಳಬೇಕು

ನಿನ್ನೆ ಕನಸಲ್ಲಿ ಬರೆದಿಟ್ಟ ಎರಡು ಸಾಲುಗಳು
ಕಳೆದುಬಿಟ್ಟಿವೆ
ಬರೆದದ್ದು ನಾನೋ ನೀನೋ?
ಮೊನ್ನೆ ಸಾಲುಗಳಲ್ಲಿ ಕಟ್ಟಿಟ್ಟ ಕನಸೊಂದು
ಹ್ಯಾಂಗೋವರಲ್ಲಿ ಮಲಗಿಬಿಟ್ಟಿದೆ
ಕುಡಿದದ್ದು ನೀನೋ ನಾನೋ?

ನನ್ನ ಕನಸುಗಳಲ್ಲಿ ನಿನ್ನ ಹೆಜ್ಜೆಗುರುತು
ಅಳಿಸಬೇಕೆಂದರೆ ಈಗ್ಯಾವ ತೆರೆಗಳ ಹುಡುಕಲಿ?
ನಾಳೆ ಮತ್ತೆ ಬಂದು ಹೋಗುವೆಯಾ please?
ಬರಿದೇ ಗುರುತುಗಳ ಉಳಿಸಿದ್ದಕ್ಕೆ ಕಾರಣ ಬೇಕಾಗಿದೆ.

ಬಂಗಾಳ ಕೊಲ್ಲಿಯಲ್ಲೊಂದು
ನಿರಂತರ ನೀರ ಮುತ್ತಿಕ್ಕುವ ತೂಫಾನು
ಬೆಂಗಳೂರಲ್ಲಿ ಒಡೆದೇ ಹೋದ ಪಚ್ಚ ಬಲೂನು
ಕೆಂಪು ಬಿಳೀ ವಾಯು ವಜ್ರ
ಕಳೆದು ಕೊಂಡ ಮುಖದವಳದ್ದೇನು ತಪ್ಪಿಲ್ಲ ಬಿಡಿ

ಹೊಳೆನರಸೀಪುರದಲ್ಲಿ ಡ್ರೈವರಿಗೆ
ದಾರಿ ತಪ್ಪಿದಂತಾದ್ದೊಂದು ಕವನ
ಅರ್ಧ ರಾತ್ರಿಯಲ್ಲಿ ಸಿಕ್ಕಿದ್ದು
ಡ್ಯೂಪ್ಲಿಕೇಟು ಸಿಗರೇಟು
ಮತ್ತೀ ಸಿಗರೇಟು ಬಿದೆಬೇಕು ಅಂದುಕೊಂಡಾಗಲೇ
ಗಿಫ್ಟಾಗಿ ಬರುವ ದುಬಾರಿ ಲೈಟರು

ಹೊರಬಂದರೆ ಕೇಸರಿ ಬಿಳಿ ನೀಲಿ ಆಕಾಶ
ಎಲ್ಲೋ ಒಂದೆಡೆ ಮುಖ ಸುಟ್ಟ ಸೂರ್ಯ
ಎರಡೂ ಕನ್ನಡಿಗಳ ಮಡಚಿ ಬಿಡು
ಇವತ್ತೊಂದಿನ ಹೆಲ್ಮೆಟ್ಟಿನ ಹಂಗೇನು ಬೇಡ

ತೆರೆಗಳೆಡೆ ಈಜಾಡಿ ಕೆಂಪಾದ ಸೂರ್ಯ
ಕೊನೆಗೂ ಸುಸ್ತಾಗಿ ಮುಳುಗಿ ಬಿಟ್ಟನಲ್ಲ
ಹೀಗ್ಯಾಕೋ ಮಳ್ಳು ಹುಡುಗ?
ಗಾಳ ಹಾಕಿ ಕೂತರೆ ಸಿಕ್ಕಬಹುದೇ ಚಂದ್ರನ ಚೂರು?
ಅಥವಾ ನಿನ್ನೆ ಮುಳುಗಿದ ಚಿಕ್ಕದೊಂದು ಚುಕ್ಕಿ?

ಇದೊಂದು ಕಾಡು ತೊರೆಯ ಜಾಡು
ಹಿಡಿದು ಹೊರಟರೆ ಒಂದಿನ ಸಿಕ್ಕಿದರೂ ಸಿಕ್ಕೀತು
ನೀ ಹುಡುಕುತ್ತಿರೋದು
ಬೇಕಾಗಿದ್ದೇನು ಅಂತ ಗೊತ್ತಿರಬೇಕು ಅಷ್ಟೇ