Posts Tagged ‘Poetry’

ಅರೆ ನಿದ್ರೆ ಅರೆ ಎಚ್ಚರ
ನೇರಳೆ ಹಣ್ಣು ತಿಂದ ಕನಸು
ಧಡ್ ಎಂದು ಕಂಬಿಗೆ ತಲೆ ತಾಗಿದರೆ
ಗೊತ್ತಿಲ್ಲದೂರಲ್ಲಿ ಪಲಾಯನವಾದಿ ಪ್ರೈವೇಟ್ ಬಸ್ಸು.

ಬೀದಿ ಬದಿ ಮನೆಯಲ್ಲಿ
ಮಗು ಅಳುತ್ತಲೇ ಇರಬೇಕಂತಿಲ್ಲ.
ನದಿಗುಂಟ ನಡೆವಾಗ
ಕೆಂಪುಕಲ್ಲುಗಳನ್ನೇ ಏಕೆ ಆಯುತ್ತೀಯ?

ಹತ್ತಿ ಇಳಿದು ಸುತ್ತಿ ನುಲಿದು
ಸಾಗುವಾಗ ಎಡಕ್ಕೊಮ್ಮೆ ನೋಡು
ದಾರಿ ಇನ್ನೂ ಅಲ್ಲೇ ಸುತ್ತುತ್ತಿದೆ.
ದೂರದಲ್ಲಿ, ಮೈಲು ದೂರದಲ್ಲಿ
ನಡೆಯುತ್ತಿರುವುದು ನೀನೆ!

ಇಕೋ, ಈ ತಿರುವು ತಿರುಗುತ್ತಲೇ
ಮುಗಿಯುತ್ತೆ ಹಾಡ್ಯ
ನಿರೀಕ್ಷಿತ ಅಪಘಾತದಂತೆ ಸಿಕ್ಕುತ್ತೆ
ನಿಮ್ಮಜ್ಜನ ಊರಿನ ಏಕಾಕಿ ಬಸ್ ಸ್ಟಾಪು.
ಪೆಟ್ಟಿಗೆ ಅಂಗಡಿಯಲ್ಲಿ ಮೂವತ್ತರ ಕನ್ಯೆ
ಸಾಲು ಬಾಟಲಿಗಳಲ್ಲಿ ಮೂರೇ ತಿಂಗಳು ಹಳೆಯ
ಶೇಂಗಾ ಹುರಿಗಡ್ಲೆ ಚಕ್ಕುಲಿ ಕೋಡುಬಳೆ.

ಮನೆ ತುಂಬಾ ಮಕ್ಕಳು ಮತ್ತು
ಕಂ ಎನ್ನುವ ಹಳೇ ಸುಧಾ ತರಂಗ ಕರ್ಮವೀರ
ಅಗಲ ಕಣ್ಣು ಚಿಕ್ಕಿಯ ಅಭಿಜ್ಞಾನ ಶಾಕುಂತಲ.
ಅಟ್ಟದ ಮೇಲಿನ ಟ್ರಂಕು ತುಂಬಾ
ಅಮ್ಮ ಆಡಿ ಬಿಟ್ಟ ಮಣಿ ಗೊಂಬೆ.
ಎಂದೂ ನೋಡಿರದ ಅಜ್ಜನ ಹಾರ್ಮೋನಿಯಮ್ಮು
ಮಾಸಿದ ಯಕ್ಷಗಾನದ ಕಿರೀಟ.

ಸಿಗ್ನಲ್ಲುಗಳಿಲ್ಲದ ಈ ಊರಲ್ಲಿ
ಯರ್ರಾಬಿರ್ರಿ ನುಗ್ಗುತ್ತದೆ ಮನಸ್ಸು.
ಮನಸೂ ಒಂದು ಪ್ರೈವೇಟ್ ಬಸ್ಸು.

Big Pink Apartment and the Lullaby of a Staggered Mind

Posted: ಜುಲೈ 12, 2011 by sukhesh in ನನ್ನ ಕವಿತೆ
ಟ್ಯಾಗ್ ಗಳು:,

Sorry. I have moved the post to my English blog to keep this site exclusively for Kannada writings. You can find it here:

http://anenigmaticjourney.wordpress.com/2011/07/28/big-pink-apartment-and-the-lullaby-of-a-staggered-mind/

ಮೃತಸಮುದ್ರ

Posted: ಜುಲೈ 10, 2011 by sukhesh in ನನ್ನ ಕವಿತೆ
ಟ್ಯಾಗ್ ಗಳು:,

ಕವಿತೆಯ ಅಪ್ಪ ಯಾರೆಂದು
ಕೇಳಬೇಡವೇ ಹುಡುಗಿ.
ಅದು ನೋವಾಗಿರಬಹುದು
ಇಲ್ಲಾ ನಲಿವಾಗಿರಬಹುದು.
ಕವಿತೆ ಹುಟ್ಟುವುದು ಹಾದರಕ್ಕೇನೆ!

ಮೆಕ್ ಡೋನಾಲ್ದಿನ ಭೂಪನ ನೋಡು
ಬೆದರುಗೊಂಬೆ ಅನ್ನಲಾರೆ ಅವನ.
ಅಕ್ಕ ಪಕ್ಕ ಕೂರುತ್ತವೆ
ನಿರ್ಭೀತ ಹಕ್ಕಿಗಳು; ಕೊಡುತ್ತ
ಫೋಟೋಗಳಿಗೆ ಪೋಸು.
ಇಂತಲ್ಲೂ ಹುಟ್ಟಬಹುದು
ಕವಿತೆಯೆಂಬ ಕೂಸು!

ಕವಿತೆ ಹುಟ್ಟಬಹುದು
ಸಿಗರೇಟಿನ ಹೊಗೆ ವರ್ತುಲಗಳಲ್ಲಿ.
ಕವಿತೆ ಬದುಕೀತು
ಬಾರಿನ ಕಮಟು ವಾಸನೆಯಲ್ಲೂ.
ಕವಿತೆ ಬೆಳೆದೀತು ಮೆಚ್ಚಿದರೂ
ಮೆಚ್ಚದ ಮಾತುಗಳಲ್ಲಿ.

ಸಿಹಿನೀರಲ್ಲಿ ಎಲ್ಲವೂ ಎಲ್ಲರೂ
ಮುಳುಗುತ್ತಾರೆ; ಸಾಂದ್ರಗೊಳಿಸು
ಬೆರೆಸುತ್ತಾ ಇಷ್ಟಿಷ್ಟೇ ಉಪ್ಪು.
ಕೊನೆಗೆ ಎಲ್ಲವೂ ತೇಲುತ್ತವೆ.
ನಿಧಾನಕ್ಕೆ ಹುಟ್ಟುತ್ತದೆ
ಒಂದು ಮೃತಸಮುದ್ರ.
ಬಂದರೂ ಬಂದೇನು ನಾನಲ್ಲಿಗೆ
ಬರೆದಾದ ಮೇಲೆ ಎಲ್ಲ ಕವಿತೆ
ಕವಿತೆ ಹುಟ್ಟಲಾರದು ಉಪ್ಪು ನೀರಲ್ಲಿ!